الشاعر جاسم الوائلي
سامحني واقبل اي عذر مني ارجوك
وانه ادري ذنبي گبال عينك مغفور
چنت استفزك انتچي اعله الدمعات
البعيوني ظلهه مكشف وما مستور
واشتم عطر شوگك واگولن دخان
ودخان غيرك يمك اشتمه اعطور
انساك گوه ويمك ايردني الليل
وبطيفك احلم . والحلم هم مجبور
لمن اشوفك عيني اغمضهه عناد
فاضحني گلبي وياك للعِشرة يثور
شوّرت بيه وحضرتك وسط الروح
امحنيهه بيدي وچنت تارسهه انذور
واتحققن كلهن اليه و ما اتوب
وارجع واگلك ( يا نذر ؟ ) كلك زور
وانته اعله چفك مو حمام الگه اشكال
حتى الفراش بگصتك شفته ايزور
روج وجرف كل عمري خلصت وياك
تكتب سطر وانه امسح اشگد اسطور
واسمع نوارس شوگنه اتگلي ارجوك
كل خطوة تمسحهه واثر ما معذور
هواي ابتعد عنك ولكن مرات
اشتاگلك عشگ الخبز للتنور
واتيقنت هسه السبب لا مو بيك
چنت الظلام آنه وچنت كلك نور
سور الموده وياي بانيه من طيب
وانه برمل هيــال بانيــلك ســور
الينباگ خله وعنده 100 الحراس
منــّه الحرامي وبيه موش الناطور
شايل امل لاحلامك وچنت تگول
تتحقق احــلام التفگ بالشاجور
سالفتك ايهاب وقره بهيل وليل
وانه السوالف مالتي بدار ودور
ما چنت اصدگ بالبعد يعمي العين
والشجرة خشبة بلايه عش يمه طيور
ما مفتهم شنهو القصد عدهم چان
هسه افتهمته اليبچي ويزور گبور
اذيتك انه واعترف اي غلطان
سامحني .جنحي بغيبتك ضل مكسور
التعليقات