سويتهم ناس

تعبت وياهم وسويتهم ناس
واخذو ضحكتي المحد يردهه

انه وزعت عمري بحجة اعزاز
مثل الوزعت بالطف ولدهه

جاملهم تصير انسان محبوب
     الناس تدور الماينتقدهه 

واذا غالين جانو رخصو هواي
الدوله التنسلب شلي بمجدهه

اشتريت حروفهم من سكتت الناس
    وجلمة وينك هواي افتقدههه

وانه محتاج كلمه ويمهم كتاب
حجوني اطفال ماتعرف قصدهه

الناس امصخ من ايام الثمانين
بوكت العوز بس الضيم عدهه

كلهن ماكلتهن واعرف الكاع
من تنداس يتكون حقدهه

مواقفهم نشاز شلون الايتام
من تضحك ودمعتهه ع خدهه

روحي عظام فقره انكسرت بليل
شته والدنيه مايرحم بردهه

  مرات التناقض يصنع جروح
واتعب من صدك لو ردت اعدهه

من تحك جلدهه تعيش السيوف
      وام الميت يكز جلدهه

اعرفهن جنت بس اني مجبور
اختنك واشتم السندانه وردهه

معذور من اعيش بدور الحبال
ركب هاي البشر تحتاج اشدهه

من كثر السهر كمت انحسب ليل
لان شمس العمر جنت اني ضدهه

عشت مفتاح فاهي بديرة جفوف
وبيبان وفه مجبور اسدهه

ماحب الذبح لو حته بالعيد
وروحي وركبتي كل يوم احدهه

توجعني الصور واكتبهن احساس
هواي تعيش من تكتب سردهه

رغم كل السوالف كلش انسان
واحبهم والسنين بكلشي اصدهه

من كالولي باجر عنك نروح
واني مزاعل الفرحه من اهدهه