عاذرها التخط عمري بكحلها
الحنينه اليلتف اليل عله ضلها
هذيج الفاتحتلي بكل حظن باب
طين وماخلق  ربك  مثلها
سوالفها ندى يغطي البساتين
الورد يتمنه ينداس برجلها
برائتهه احتوت عش العصافير
ترفه ويشبه النورس شكلها
بسحر اعيونها تلم كل العيون
بس وياي مالمت شملها
ماجرحتني حتى الچم واشتاگ
خل شما تسوي بروحي خلها
جزعت من مزاجي وجذبي والشوك
رغم تعرفني بالحب استغلها
چانت من اغيب ترخص الدموع
وچنت ارتاح كل ليله بزعلها
 اول مره احس بروحي غلطان
بحقها ومارحت طالب رظاها
عشگتني صدگ بس اني چذاب
واحسسها چنت مو مستواها
چنت مغرور وارسم عالحياطين
عزت نفسي والدم الچواها
ماردت اعتذر خليتها تموت
بحسرتها وگلبها يحن گظاها
خفت لا روح ليها تكلي بعديش
طكت وردتي وغيرك حواها
عمر خلصته يمها اعتاب وفراگ
وكظيت اعيونها وصوفر ظواها
چانت يمي بس البال للغير
ومثل الطفل هسه انحب وراها
من گد ماتحبني صارت اشراع
وفتحت گاعها لطولي وسماها
اشد اسنيني ناذر عالشبابيچ
وسويهن علگ رجعه لجفاها
بكثر ماعاض اصبع الها واشتاگ
حالف من تجيني اشبگ گفاها
لان بفراگها ما شايف الخير
ضعت واليل بز عيني وعماها
عشت مثل الرساله بجيب مكتول
واعمه الفتش اجيوبه وخذاها
لاحرگني بيده خاطر ارتاح
ولا لصويبحه انطاها وقراها