نتشاوف عسانه بخير
نتشاوف عسانه بخير
حجاها وضحى بالعشره
وتركني بالدرب نظره
ورجع مخنوك بالعبره
وقبلت بدمعته وعذره
وهم عاداها مابطل
نتشاوف عسانه بخير
هاي حجايته المره
وخلصت مدري ماخلصت
نسيت أشكال ع العشره
بساعتها أنصدمت هواي
وكل الكاله ماذكره
بس معنى الحجي مبين أفتهمته أو وصلت الفكره
راد أيكبر بفركاي الشوكه بداخلي شكبره
الوعدني أيظل عمر وياي مهما يصير لو يجرى 
عافاني السبب مجهول محد كادر أيفسره
وفجأه اللبن صبح ماي
وكسر عودي ألف كسره
وماعاتبته لو لمته طلب من عندي ما أخره
وعاقل صرت بفراكه
مشيت بشوره وبأمره
خذت شمره أظل ساكت على البفراكي أخذ شمره
وهم من راح ماقصر عاف ألعيني ألف ذكرى 
بين الصور أنه وياه وبين الكعده يم شجره
وذكرت أشكد سهرنه الليل الحد ساعات متأخره
وبين الزعل ومراضات جانت سهره من سهره
وسافرنه وضحكنه هواي
وبجينه بأخر السفره
بجينه من الربيع الصار خريف ودولب الشجره
وبين فراكه وفراكي انكطعت بيدنه الشعره
ورجعلي بس رجعلي شلون رجعه هواي متأخره 
لكه الجمره الزرعها بيوم نار ومابقت جمره
حركت خيمة أيامي وذيج أحلامنه الخصره 
ولكاني طفوف يابو طفوف دخان وهوى وصحرى 
ولكاني بكبر وبصفي كاع أمحظره ألكبره...