بقلم الشاعر وسام التميمي

بقى وحده الوطن واتعوذ الشيطان 
وبده موت الحياة ايردد بحتفه 

وصل طيف الخشب لمناشغ النيران 
وحچه ذاك التراب البيه اثر عفه 

وطن خلص حياته بغير راحت بال 
ويتاني الغيور اليوكف ايسعفه 

چدح ليلك نهار وبيه اثر عميان 
وفزت كل حراره انبعثت بجتفه 

بهدوء الناي يركص كل جرح خدارن 
ولحن موتك غريب ومحد يعزفه 

يلعايش وحيد ابديرة الخرسان 
منو ايكلي غريب وعايش بمنفه

واصفن بالهوه الشافك نهار ايضيع 
تعال وشوف جرحي اكوار شيلفه 

بقيت بعازة اليكتل خيال وروح 
انكتل حظنك خيال وماتت الرئفه 

وبده يخذلك حنين الروج والامواج 
وتكره كل زراگ البیه اثر ضفه 

مرات النهر مايروي كل عطشان 
واليعطش دفو شيسوي بالرشفه 

وبديت اتهز اديك بفرة الناعور 
ماترجع شفتها سنينك الترفه
 
نزع ثوبه الخريف ابكل ورگ ذبلان 
ومشى لون الصفار وكتلته الصدفه 

كلما ينبعث جيل الحياة وياك 
على متون الخلك للمكبره تزفه 

انكسر ظهر الكصب واتعرين الشلال 
وبقت صفنة ضميرك تكسر السعفه