مليت الجذب والمستحه من الناس
ومليت اليعاشرني ويدورني حطب للفاس
أثاري العشره للماله عرف بالروح 
دوخت راس
وطبع الدنيا مثل اطباع المرايه
وجهها تشوف بي روحك ومگفاها صبح چذاب
وعرفت الدنيا بس انته الصدك بيها
ولگيت الگمره زفت ليل وعيونك تراجيها
ولگيت ولايتي عيونك
وعرفت المستحه بلونك
وشفت الناس يتهجون بيك سنين بلكن عود يقرونك
قريت سوالفك كلها ومشيتك راي
وعرفت الگاع البروحي .... تريدك ماي
وتوسلتك تجيني بنومتي تجسني حلم بهداي
اي بهدااي
خافن من فرحتي اكعد وضيعنك
عسه ويمته ... وتلمني بجلمة المامش نذر وارتاح
وتذكرني بحجي العشرين من جانن طعم تفاح
يلمابينك وبيني سما ولايات وين الگاك
يشنهي وسولت البطران يتنشد بهذا وذاك
افزع ياصدگ والگاك بي شذره 
ومواعيد الصدگ والليش سدت للمسامر بوب
وشحيحه وجوه اليحبون 
وانه ابينهم تيهت وجه متعوب
والياريت تتبعني بتفاصيلي 
وتيه بوحشتي نجمه بسمه ولايه
ويم اشفاف كل محتام صعبه تصير الحجايه
وانته حجايتي .. ودنياي بس انته الصدگ بيها?