الشاعر فائز البدري
ملكه المعزب يشبع مييت ضيف
وماكو داعي ايكوم لو يذبح فرس
الوجه فارغ لو يحط روحه بعشاه 
لا شبع ضيفه ولا جدرة انترس
الحلكه يحجي السنعه تلكه بصفه ناس 
المايعرف يسولف ايخاوي الخرس 
الدنيا صلفه تريد واحد كلفه كون
يصطر الديوان اذا سولف جرس
مو صنم كاعد حدر فيي المضيف
وربعه وكت الراي ما سمعوه عطس 
خلي عزة نفس عندك هي روح
الطير لو ما روحه ماشفته رفس 
وجيب حكه اليعتني ويتحامى بيك
المايرد احكوك عند اهله رخص
صير مثل الإبرة تهوى اليلتقون
لاتدور التفرقه وتصبح مكص 
وعزب بروحك اذا شح المضيف 
واكرم بكيعانك ووزع حصص
 دوم للخطار يكرم فيض ايديه
اشكثر منطي النهر ما كالو نكص 
وتاني ضيفك عالدرب لازم يجيك
واحبس بصدرك ترى ابنادم قفص
الناس كلها مناطرة لجية عزيز
وعلى الدروب الجاية الميت شخص 
ومن تخوف ناسك اتلوذ بوراك 
ولمهابة روحك تألف قصص
الناي كصبه الحية ما كدرت عليه
خوف هزت راس ما تهوى الركص 
وصي سهمك من تنيشن خل يجيس
الصيدة غير الوحدة ماتنطي فرص
ومثل طبع الذهب خلك من تعيش
غالي دوم ومانزل ساعة ورخص
أعلى الدلال الخادرة ايدل المضيف 
وعلى السمعه النافعه الخير حرص
وجلمة التنكال لا تطري على ضيف 
والحجاية الماصخه تغم الجفص
مو لياهو الجان يتعنى ويروح
الضيف من يجبل ترى ايعرف الكصص