قصيده عن لسان الحشد

انه الماحچيت ابيوم بلمنكر
ولا واحد نخاني وگلت ما اگدر

عاشرت الكرامه بهزت الكاروك
ويه المو ذرب ماطابلي المعشر

انه ابن العاليات المايطخن راس
شاهين وفقط فوگ القمم وكّر

المايعرف يميز الصگر من البوم
مانحسب وجوده ويمنه لا يحظر

نريد البي مروه بروحه يشري رجال
منريده اليبيع اخوانه من يظطر

بياع الزلم مو ثوبنه نخاويه
نخاوي المايبيع لگطعت المنحر

التفگه اتريد اخوها المايهدهه بساع
اليبيض الوجه من يلزم الصنگر

المهره تريد فارس يظبط الهه اعنان
يثبت علسرج لمّن يصير الكر

الحومه تريد اهلهه وموش ياهو الچان
يگحمهه ويرد الجايات ابشَر

مو ياهو اليجي يلاكي برحابه الموت
ولا ياهو اليجي بسمراته يتصبر

الوطن لهل المرقط موش للغمان
البطرگ الچذب ومخالطه المنكر

اذا مابيك همه تكتر انه اكفيك
مامحتوي الخيره اتجنب اهل الشر

واكرمني بسكوتك وانه ارد الگاع
وبقى اعللكراسي وبيهن مگشّر